ევროკავშირი უკრაინას ეკონომიკური მდგომარეობის დასტაბილურებისთვის 1 მილიარდ ევროს გამოუყოფს
უახლოეს მომავალში უკრაინამ შესაძლოა ევროკავშირისგან 1 მილიარდი ევრო მიიღოს. აღნიშნული თანხა ქვეყანაში ეკონომიკური სიტუაციის დასტაბილურებისთვისაა საჭირო, აცხადებენ კიევში. მანამდე, ბრიუსელმა უკრაინას 3 მილიარდ ევროზე მეტი გამოუყო.
უახლოეს მომავალში უკრაინა ევროკავშირთან მიკროსაფინანსო დახმარებაზე შეთანხმებას ხელს მოაწერს. ამის შესახებ უკრაინის წარმომადგენელმა ევროკავშირში, ნიკოლაი ტოჩიცკიმ განაცხადა.
შეთანხმებაში საუბარია 1 მილიარდი ევროს გამოყოფაზე.
"არის პროგრესი, არის ასევე გარკვეული პირობები, თუმცა აღნიშნულ პირობებს ვერ გავამხელ, სანამ შეთანხმებაზე ხელი არ იქნება მოწერილი. ხოლო ეს უახლოეს მომავალში მოხდება."-აცხადებს ტოჩიცკი.
მაისის ბოლოს ევროკავშირის საბჭო შეთანხმდა უკრაინისთვის 1 მილიარდი ევროს გამოყოფაზე ორი წლით.
აღნიშნული გადაწყვეტილება ძალაში ივლისში შევიდა. ევროკავშირი უკრაინას ფულს მესამედ გამოუყოფს. მანამდე ბრიუსელმა უკრაინას 2014 წელს 1,6 მილიარდი, 2015 წელს კი 1,8 მილიარდი ევრო გამოუყო.