ნინო ასათიანი: PR-ი ესაჭიროება ყველა კომპანიასა და ორგანიზაციას, რეკლამა კი არა
"პიარი არის რამოდენიმე პროფესიის ერთობლიობა, ის ზრუნავს, როგორც კომპანიის რეპუტაციაზე ასევე მის პოპულარიზებაზე, საზოგადოების ინფორმირებულობაზე, კეთილგანწყობილი და გრძელვადიან კავშირის დამყარებაზე.
ჩემთვის წარმატებული PR კამპანია არის ყველა ის პროექტი, რომელიც მთლიანად დაფუძნებულია მომხმარებლის მიმართ ლოიალობის გამოხატვაზე და მათთვის მოტივაციის შექმნაზე. ავღნიშნავდი ამერიკულ პიარ კომპანია – "ედელმანს" რომელსაც 2015 წელს თითქმის მილიარდამდე ქონდა შემოსავალი და მსოფლიოს მასშტაბით ამ კომპანიაში მუშაობდა 5849 თანამშრომლი", – აცხადებს "ტრანს ელექტრიკა ჯორჯიას" PR მენეჯერი ნინო ასათიანი
– რა განსხვავებაა პიარსა და რეკლამას შორის?
– ძველი გამონათქვამია: "რეკლამა ეს არის – რისთვისაც ვიხდით, ფაბლისითი – რისთვისაც ვლოცულობთ". ძირითადი განსხვავება PR-სა და რეკლამას შორის არის ის, რომ PR-ი ესაჭიროება ყველა კომპანიასა და ორგანიზაციას, რეკლამა კი არა. რეკლამისაგან განსხვავებით PR-ი ხანგრძლივი მოქმედების სტრატეგიებს შეიმუშავებს, რეკლამის პრიორიტეტი კი მისი ლაკონურობა და სწრაფი შედეგია. პიარი გეგმავს და ცდილობს გათვალოს რეკლამის შედეგები. რეკლამა პიარის დანამატია. რეკლამით მიღწეული შედეგი დროებითია რადგან სქემატურად თუ არ მუშაობს კომპანია თავისი იმიჯის ასამაღლებლად ის არ შეიძლება იყოს წარმატებული.
აღსანიშნავია, რომ ორივე დარგი მჭიდროდ არის დაკავშირებული ერთმანეთთან, ხშირ შემთხვევაში, მათი გარჩევა შეუძლებელია.
– თქვენი კარიერის განმავლობაში რომელი მედია განთავსებებით ამაყობთ?
– 2005 წელს გაზეთ "რეზონანსში" იბეჭდებოდა ჩემი სტატიების სერია – "კიდევ ერთხელ გაზის პრობლემების შესახებ რეგიონში", რომელიც საკმაოდ აქტუალური იყო.მაშინ ის პერიოდი იყო, როცა სოკარი შემოდიოდა საქართველოს ენერგეტიკულ ბაზარზე და რეგიონში სრულიად ახალი ურთიერთობები ყალიბდებოდა. ასევე 2012 წლიდან ვთანამშრომლობ ინტერნეტ პორტალ ფორ.გე-სთან. მეამაყება, რომ მქონდა შესაძლებლობა ვყოფილიყავი იმ ჯგუფის წევრი რომელმაც შეიმუშავა "საქართველოს ენერგეტიკული სტარტეგია" 2004 წელს და გამოსცა სამ ენაზე.
– დაასახელეთ თქვენი საუკეთესო პროექტი.
– როდესაც ჩემი პროფესიული კარიერა დავიწყე საკმაოდ რთული პერიოდი იყო ქვეყანაში, დავიწყე საქმე რომელიც ახალი ხილი იყო ყველასთვის. ერთ პატარა ოთახში დაქსეროქსებული ლიტერატურით დავიწყე და ინოვაციურ ტექნოლოგიებამდე მივედი.
ასევე ურთულეს დროს, 1997 წელს დავიწყე მუშაობა ენერგეტიკაში. მიმაჩნია წარმატებული იყო პიარ კომპანია, რომელიც საქართველოს ენერგეტიკული სექტორის რეფორმების განხორციელებას ეხებოდა-2001 წელს შემუშავებული საზოგადოებასთან ურთიერთობისა და კომუნიკაციის სტრატეგიები, ენერგეტიკულ სექტორში მიმდინარე რეფორმების გაცნობა საზოგადოებისათვის. 2007 წელს ჩემს მიერ შემუშავებული კომუნიკაციის სტრატეგია მარეგულირებელი კომისიისათვის, რომელიც ტარიფების დადგენას შეეხებოდა ERRA-მ და NARUC-მა საუკეთესო ქეისად აღიარა და ევროპისა და ამერიკის მარეგულირებლების სასწავლო მეთოდოლოგიაში შეიტანეს. ბოლოს იყო "ხუდონჰესის" პიარ კომპანია, რომელიც საინტერესო და ურთულესი აღმოჩნდა, თუმცა ვთვლი რომ 40 წლიან ნეგატივის დამსხვრევა საკმაოდ ძნელია, მაგრამ სასიამოვნოც არის როცა ამას ახერხებ.
– როგორ ახდენთ სოციალური მედიისა და პიარის ინტეგრაციას?
– პიარ კამპანიის მნიშვნელოვანი წილი სოციალურ მედიაზე მოდის. დღეს კომუნიკაციის ყველაზე ეფეტქური საშუალებაა, რაც საშუალებას გაძლევს, განსაზღვრო სამიზნე ჯგუფი და პირდაპირ კავშირზე გახვიდე მასთან. სადღეისოდ აქტუალურია შეკითხვა შეძლებს თუ არა სოციალური მედია ტრადიციული მედიის ჩანაცვლებას? ვფიქრობ რომ, არა! ბლოგ პოსტი Facebook-ზე ან Twitter სტატუსი არ არის საკმარისი, ვიდრე სტატია ან გამონათქვამი კითხვად და პოპულარულ გაზეთში. სოციალური მედია შეიძლება იყოს დამატებითი სერვისი, რომელიც აძლიერებს პიარს.
– როგორ უჭერთ მხარს კონტენტურ მარკეტინგს?
– კონტენტ მარკეტინგზე საუბარი მასობრივად 2009 წელს დაიწყეს, დღეს კი კონტენტ მარკეტინგი მსოფლიო მარკეტინგული ბაზრის ერთ-ერთი მნიშვნელოვანი ტენდენციაა.
კონტენტ მარკეტინგი ქმნის და ავრცელებს ღირებულ, დროულ, საჭირო ინფორმაციას განსაზღვრული სამიზნე აუდიტორიის ყურადღების მისაქცევად, შთაბეჭდილების მოსახდენად. დღეს ამ მიმართულებაში ერთ-ერთი ყველაზე მოთხოვნადი ინფოგრაფიკები და ვიდეოინფოგრაფიკებია. ის ვიზუალიზაციას უკეთებს კონტენტს, შედეგად კონტენტი იქცევს მკითხველის ყურადღებას, ის ადვილად აღიქვამს ინფორმაციას და ამახსოვრდება დიდი ხნის მანძილზე.
როცა ძალიან ცდილობ, მთელ შენს თავს თავდაუზოგავად დებ საქმეში, რომელიც უკვე შენი ცხოვრებაა, ის საქმე უცილებლად გამოგდის. ყოველდღიურად ვცდილობ ახალი რამე ვისწავლო, გავიზარდო, ახალ და ინოვაციურ ტექნოლოგიას ვეზიარო, თითქმის არასდროს ჩამითვლია, რომ რამე განსაკუთრებული და წარმატებული შევქმენი და ამ შედეგზე უნდა გავჩერდე, პირიქით ყოველდღიურად ვეძებ, ვცდილობ უფრო გავიზარდო და უფრო წარმატებული გავხდე.
– რას გააკეთებთ თუ კლიენტი ან მენეჯერი შეეწინააღმდეგება თქვენს პიარ სტრატეგიას?
– პიარი ეს არის დარწმუნების ბიზნესი და თუ გნებავთ ხელოვნებაც კი. მე ყოველთვის ვცდილობ დავარწმუნო ჩემი აუდიტორია, რომ მხარი დაუჭიროს ჩემს პოზიციას და აღიაროს ის მიღწევები და წარმატებები, რასაც განსახორციელებელ პიარ სტრატეგიებში ვდებ, თუმცაღა არც კონსენსუსის მიღწევა მიჭირს.
თუ მე, როგორც პიარ სპეციალისტმა ვერ დავარწმუნე ჩემი კლიენტი ან მენეჯერი, როგორ დავარწმუნებ საზოგადოებას ჩემი პოზიციის მართებულობაში? ასე რომ, როდესაც პიარ სტრატეგიაზე ვმუშაობ მაქსიმალურად ვცდილობ გავითვალისწინო კლიენტის მოთხოვნები, მიუსადაგო ის არსებულ რეალობას და თანხვედრაში მოვიყვანო საზოგადოებისა და კომპანიის სურვილები.
– გაგვიზიარეთ თქვენი გამოცდილება უარყოფით მედია შემოტევაზე რომელსაც გამკლავებიხართ.
– ჩემი ბიოგრაფიიდან გამომდინარე უამრავი უარყოფითი მედია შემოტევისთვის მიპასუხია და შემომიბრუნებია სიტუაცია. სადაც კი დამიწყია მუშაობა, რა პროექტისთვისაც მომიკიდია ხელი ყველა პრობლემური და რთული იყო. ურთულესი იყო გაზპრომთან გაფორმებული ხელშეკრულების პიარ უზრუნველყოფა 2003 წელს, ეს აღარ იყო ერთი კონკრეტული ხელშეკრულება, ეს იყო პოლიტიკა და ყველა ცდილობდა ქულები ჩაეწერა, თუმცაღა დრომ აჩვენა რომ ამ ხელშეკრულების ქოლგის ქვეშ საქართველო 2016 წლამდე იღებდა გაზს და ვინც გვებრძოდა მან გადასარევად გამოიყენა ეს ხელშეკრულება, რადგანაც ის საქართველოსთვის საკმაოდ ხელსაყრელი პირობებით დადებული, უცილებელი ხელშეკრულება იყო. ასევე საკმაოდ უარყოფითი იყო გაზისა და ელექტროენერგეტიკული ტარიფების გაზრდაზე, როცა საზოგადოებრივი აზრის გარდატეხას ვცდილობდით, თუმცაღა წარმატებულად შევძელით შეგვეცვალა ჩამოყალიბებული სტერეოტიპები და საზოგადოებამდე მიგვეტანა ჩვენი მესიჯები და მოსაზრებები.
– ყოფილ თქვენი პიარ კომუნიკაცია არასწორად აღქმული სამიზნე აუდიტორიის მიერ? როგორ გაუმკლავდით ასეთ სიტუაციას?
– მახსენდება 2000 წელს თელასის პრივატიზაციის პროცესის დროს სამიზნე აუდიტორიების აგრესიულობა და პიარ კომუნიკაციის დროს დაშვებული ხარვეზები, თუმცა ძალიან მალე მოხდა პრობლემების იდენტიფიცირება და პიარ კომუნიკაციის შეცვლა, რამაც სასურველი შედეგი გამოიღო.
– როგორ უმკლავდებით პიარ კრიზისულ მდგომარეობას კომპანიაში?
– კრიზისული სიტუაცია ყოველდღიური ქართული რეალობის თანმდევი პროცესია.რას ვაკეთებ კრიზისის დროს? ვამუშავებთ ანტიკრიზისულ გეგმას, მაქსიმალურად ვაუმჯობესებთ შიდა კომუნიკაციებს, მყისიერად ვიკრიბებით ანტიკრიზისული შტაბის წევრები, ვხვეწავთ მესიჯ ბოქსებს, გადაგვაქვს აქცენტები,ვამზადებთ პასუხებს არასასურველ კითხვებზე, გამოვყოფთ სპიკერებს თავთავიანთი მიმართულებით და ვანხორციელებთ მედიამონიტორინგს ყოველდღიურად.
ასევე უმნიშვნელოვანესია კრიზისის შემდგომ მუშაობა: კრიზისის შეფასება და მისი გამომწვევი მიზეზების ანალიზი, გზავნილების ადაპტირება პოსტ კომუნიკაციისთვის,პოსტ კრიზისული ანალიზი (რა გაკეთდა სწორად და რა არასწორად)
– რა არის ყველაზე საინტერესო პიარ სფეროში მუშაობაში. რას გააუმჯობესებდით?
– ჩემი აზრით, ყველაზე საინტერესო დეტალებზე ყურადღების გამახვილებაა.წინასწარ უნდა შეძლო ადამიანების რეაქციის განსაზღვრა შენს მიერ შემუშავებულ პიარ კომუნიკაციაზე, ყოველდღიურად უნდა ხვეწავდე შენს უნარებს და იღებდე უფრო მეტ განათლებას. რაც არ უნდა დიდი ხანი იყო პიარში, ყოველდღიურად უნდა სწავლობდე, წერდე, კითხულობდე, სიამოვნებას ღებულობდე წერისა და საუბრისგან, ვისაც შეუძლია კარგად ახსნა, ის ყოველთვის შეძლებს სხვის დარწმუნებას.