რომის მახლობლად სახლები 1 ევროდ იყიდება
იტალიის სხვადასხვა რეგიონებში, მაცხოვრებლებისაგან დაცლილი სოფლების შევსების მიზნით, სახლები 1 ევროდ იყიდება. ამის შესახებ CNN წერს.
რომის რეგიონის პირველი დასახლება, რომელიც ამ აქციას შეუერთდა პატარა ქალაქი მაენცაა. ისტორიული ადგილი, დედაქალაქის სამხრეთით მდებარეობს, სადაც ოდესღაც მწყემსები და ცეცხლის ტომები ცხოვრობდნენ. აქ ათობით მიტოვებული ქვის საცხოვრებელია.
ქალაქის მერი კლაუდიო სპერდუტი აცხადებს, რომ იგი ქალაქის აღორძინების ამბიციურ პროექტს იწყებს. მისი თქმით, პროექტის მთავარი მიზანია ყველა მიტოვებულ სახლში ახალი მაცხოვრებლები განათავსოს.
“ყველაფერს ნაბიჯ-ნაბიჯ მივყვებით. მესაკუთრე ოჯახები გვიკავშირდებიან და უფლებას გვაძლევენ უძრავი ქონება სპეციალურ ბაზაში განვათავსოთ, რათა ყველაფერი წარიმართოს გამჭვირვალედ”, – ამბობს სპერდუტი CNN-თან ინტერვიუში.
ქალაქის მერია იმედოვნებს, რომ 100-მდე მიტოვებულ სახლს ახალ სიცოცხლეს შესძენს.
მყიდველი ვალდებულია შეძენილი სახლი სამ წელზე ნაკლებ პერიოდში განაახლოს. ამასთან უზრუნველყოფის გარანტიის სახით ანაბარზე უნდა ჰქონდეს 5000 ევრო, რომელიც სახლის დასრულების შემდეგ უკანვე დაუბრუნდება.
იტალიაში ერთ ევროდ სახლის შეძენას კომუნა პრატოლა-პელინიაში, აბრუცოს რეგიონშიც შეძლებთ. უძრავ ქონებაზე ასეთ დაბალ ფასს ადგილობრივი ადმინისტრაცია იმით ხნის, რომ ტერიტორია იცლება. ახლა აქ 600-მდე ცარიელი სახლია.